இங்கிலாந்து லண்டன் லார்ட்ஸ் மைதானத்தில் நடைபெற்று வரும் ஆஷஸ் தொடரின் இரண்டாவது போட்டியானது கடந்த ஜூன் 28-ஆம் தேதி முதல் துவங்கி நடைபெற்று வருகிறது. இந்த போட்டியில் டாசில் வெற்றி பெற்ற இங்கிலாந்து அணி முதலில் பந்துவீச்சை தேர்வு செய்ததால் தங்களது முதல் இன்னிங்க்ஸை விளையாடிய ஆஸ்திரேலியா அணியானது 416 ரன்களுக்கு அனைத்து விக்கெட்டுகளையும் இழந்தது.
அதனை தொடர்ந்து தங்களது முதல் இன்னிங்க்ஸை விளையாடிய இங்கிலாந்து அணி 325 ரன்கள் குவிக்கவே 91 ரன்கள் முன்னிலை பெற்ற நிலையில் ஆஸ்திரேலியா அணி தங்களது இரண்டாவது இன்னிங்சில் 279 ரன்களை குவித்தது. இதன் காரணமாக 371 ரன்கள் அடித்தால் வெற்றி என்ற இலக்குடன் விளையாடி வரும் இங்கிலாந்து அணியானது இரண்டாவது இன்னிங்ஸில் நான்காம் நாள் ஆட்டநேர முடிவில் 4 விக்கெட்டுகளை இழந்து 114 ரன்களுக்கு தடுமாறி வருகிறது.
இந்நிலையில் போட்டியின் கடைசி நாளான இன்று வெற்றிக்கு 257 ரன்கள் தேவை என்கிற நிலையில் கைவசம் ஆறு விக்கெட் மட்டுமே எங்கே உள்ளதால் இந்த இந்த போட்டியில் ஆஸ்திரேலிய அணியின் கையே ஓங்கி உள்ளது. ஏற்கனவே முதலாவது போட்டியில் ஆஸ்திரேலிய அணி வெற்றி பெற்றுள்ளதால் இந்த போட்டியிலும் வெற்றி பெறும் பட்சத்தில் 5 போட்டிகள் கொண்ட இந்த தொடரில் ஆஸ்திரேலிய அணி இரண்டுக்கு பூஜ்ஜியம் (2-0) என்ற கணக்கில் முன்னிலை வகிக்கவும் பிரமாதமான வாய்ப்பு காணப்படுகிறது.
இந்நிலையில் இந்த போட்டியில் ஆஸ்திரேலிய சார்பாக விளையாடிய வேகப்பந்து வீச்சாளரான மிட்சல் ஸ்டார்க் முதல் இன்னிங்சில் மூன்று விக்கெட்டுகளையும், இரண்டாவது இன்னிங்சில் இரண்டு விக்கெட்டையும் வீழ்த்தியுள்ளார். இதன்மூலம் அவர் ஆஸ்திரேலியா அணிக்காக டெஸ்ட் கிரிக்கெட்டில் அதிக விக்கெட்டுகளை வீழ்த்திய இடதுகை வேகப்பந்து வீச்சாளர் என்ற சாதனையை படைத்துள்ளார்.
இதற்கு முன்னதாக மிட்சல் ஜான்சன் 313 விக்கெட்டுகளை வீழ்த்தி அதிக விக்கெட்டுகளை வீழ்த்திய ஆஸ்திரேலிய இடது கை வேகப்பந்து வீச்சாளர் என்ற சாதனையை வைத்திருந்த வேளையில் தற்போது 315 விக்கெட்டுகளுடன் அவரை பின்னுக்கு தள்ளி ஸ்டார்க் முதலிடம் பிடித்துள்ளார். அதோடு ஒட்டுமொத்தமாக டெஸ்ட் கிரிக்கெட்டில் அதிக விக்கெட்டுகளை வீழ்த்திய ஆஸ்திரேலிய வீரர்களின் பட்டியலில் ஐந்தாவது இடத்திற்கு அவர் முன்னேறி உள்ளது குறிப்பிடத்தக்கது.