திருப்பதி ஏழுமலையான் கோவிலில் 3 மாதங்களுக்கு முன்பே தரிசன டிக்கெட்டுகளை முன்பதிவு செய்ய தேவஸ்தான நிர்வாகம் வசதி செய்துள்ளது. அந்த வகையில் திருப்பதி ஏழுமலையான் கோயிலில் அக்டோபர் மாதம் சாமி தரிசனம் செய்வதற்கான டிக்கெட்டுகளை ஆன்லைனில் வெளியிடும் தேதியை திருப்பதி தேவஸ்தானம் அறிவித்துள்ளது.
அதன்படி வரும் 18 ஆம் தேதி அதாவது நாளை மறுநாள் காலை 10 மணி முதல் 20 ஆம் தேதி காலை 10 மணி வரை, குலுக்கல் முறையில் தேர்ந்தெடுக்கப்படும் சுப்ரபாதம், அர்ச்சனை, தோமாலை உள்ளிட்ட சேவைகளுக்கான டிக்கெட்டுகள் வெளியிடப்படவுள்ளது. அன்றைய நாள் மதியம் 12 மணிக்கு குலுக்கல் முறையில் தேர்ந்தெடுக்கப்படும் பக்தர்கள் பணம் செலுத்தி டிக்கெட்டுகளை பெற்றுக்கொள்ளலாம் எனவும் அறிவிப்பட்டுள்ளது.
கல்யாண உற்சவம், ஊஞ்சல் சேவை, ஆர்ஜித பிரம்மோற்சவம், சகஸ்ர தீப அலங்கார சேவைகளுக்கான டிக்கெட்டுகள் ஜூலை 22 ஆம் தேதி காலை 10 மணிக்கு ஆன்லைனில் வெளியிடப்படும் என தெரிவிக்கப்பட்டுள்ளது. இதே சேவைகளில் பங்கேற்காமல் நேரடியாக சாமி தரிசனம் செய்வதற்கான டிக்கெட்டுகள் 22 ஆம் தேதி மாலை 3 மணிக்கு வெளியிடப்படும் என தேவஸ்தான நிர்வாகம் அறிவித்துள்ளது.
அக்டோபர் மாதம் அங்கப்பிரதட்சணம் செய்வதற்கான இலவச டோக்கன்கள் வரும் 23 ஆம் தேதி காலை 10 மணிக்கு வெளியிடப்படும் என தெரிவிக்கப்பட்டுள்ளது. இதேபோல் ஸ்ரீவாணி அறக்கட்டளைக்கு 10 ஆயிரம் ரூபாய் நன்கொடை செலுத்தி பெறப்படும் வி.ஐ.பி. தரிசன டிக்கெட்டுகள் 23 ஆம் தேதி காலை 11 மணிக்கு வெளியிடப்படும் என தெரிவிக்கப்பட்டுள்ளது.
மேலும் மூத்தகுடிமக்கள் மற்றும் மாற்றுத்திறனாளிகள், போன்றவர்களுக்கான டிக்கெட்டுகள் வரம் 23 ஆம் தேதி மாலை 3 மணிக்கும், அக்டோபர் மாதத்திற்கான 300 ரூபாய் சிறப்பு கட்டண தரிசனத்துக்கான டிக்கெட்டுகள் வரும் 24 ஆம் தேதி காலை 10 மணிக்கு வெளியிடப்படும் எனவும் தேவஸ்தான நிர்வாகம் அறிவித்துள்ளது.
இதேபோல் திருமலை மற்றும் திருப்பதியில் அறைகள் முன்பதிவுக்கான டிக்கெட் 24 ஆம் தேதி மாலை 3 மணிக்கு வெளியிடப்படும் எனவும் அறிவிக்கப்பட்டுள்ளது.